Informação
CONTADOR MENSAL

Locations of visitors to this page


REALTIME





    Album de Miguelsf>> página inicial   

    Fotos:
   Textos:
.. Macau di hôji ..

MACAU DI HÔJI

Diferente, qui crecido
Estunga téra di encanto
Macau nôsso di Nómi Santo
Tem cuidado, tem juízo

Pónti velo, pónti novo
Cartá vida tê Coloán
Macau d'hôji novo rôsto
Andá azinha, nunca "man-man".

Entendimento abrí Porta
Olá mar ... faltá lórcha
Macau d'hôji quelê mudado
Praia-Grándi ficá lago.

Aropôrto, pa ismerá
Tóri alto, na céu furâ!
Macau d'hôji modernado
Antigônço cai na lado

Caraóqui pa goelá
Sauna-sauna ... bafá-assá
Macau d'hôji di casino
Co sapéca pa ispalá

Tem "Venetian" co gondolêro
"Sole Mio" fantochêro
Macau d'hoji di fantasia
Tapâ cara di mato Guia!

Tiro grandi tudo vánda tem.
Cachi-Váchi co Mercêdi-Bem.
Macau d'hôji co genti póbri
Fingí rico ficá nóbri

Russa-russa co francês
filipino co tailandês
Macau d'hóji vangueado
Co tanto raça champurado

Gatunéro co vilám
Bulí gente co parám
Macau d'hôji vida duro
Morê gente sim razám.

Masquí séza diferente
Estunga téra sâm di nôsso gente
Macau nôsso, d'hôji, d'ónte,
Nôsso berço pa tudo sempre.

Macau nôsso, d'hôji, d'ónte,
Unga téra pa nôs ficá !


Miguel Senna Fernandes (1995,2007)